انا طالب جديد عايز نصييحتكم لو سمحتم متبخلوش عليا بردودكم

السلام عليكم ورحمه الله وبركاته يا شباب انا مكتب التنسيق رشحني لكليه التعليم الصناعي بني سويف انا كنت جايب في الصنايع خمس سنين 88% بعد تعب خمس سنين ومذاكره وسهر ليالي وللأسف الشديد ملحقتش كلية الهندسة مع ان الهندسة قبلت طلاب الثانوى من 87% يا تري تنصحوني ان اكمل في التعليم الصناعي يا ريت حد يقولي ايه هي ميزات كليتكو وعيوبها عشان اقدر اختار اما اكمل او كفايه لحد كده وايه مستقبلكو كطلبه يعني هتشتغلو ايه بعد لما تتخرجو يا ريت يا شباب لكل اعضاء المنتدي مبيخلوش عليا بالنصيحه بجد انا نفسي اسمع كل نصايحكم ليه وهستني ردكم عشان انا معتمد علي ردودكم لو الردود ايجابيه هيبقي هكمل في كليتكم ولو سلبيه يبقي انا لله وانا اله راجعون

والله ياباشا انا فى سنة تانية ومش عارف حتخرج ايه من الكلية دى
ربنا يستر وميجليش شلل قبل ماتخرج منها

ياعم ادهم صلي علي النبي
الكليه دي بتعادل الهندسه بس انت ذاكر وشد حيلك واتخرج وملكش دعوه
الكليه دي الفتره دي واللي جايه اسمها هيظهر اكتر من الاول و دا رد علي اسامه اللي مش عارف هيبقي ايه
المصانع دلوقتي معظمها بيطلبوا خريجي تعليم صناعي بالاسم وبعضها مش بيهتم بالقسم كمان
ودا عن تجربه و لو عايز اسامي مصانع اقولك يا سيدي
عندك مصنع اسمنت بني سويف - الشركه السويسريه للملابس القطنيه - مصنع اسمنت جنوب الوادي
و شفت بعيني ناس متخرجه من عندنا و شغاله فيهم , و مازالو بيطلبوا ناس لحد دلوقت
بس الله اعلم بقي هيفضلو يطلبوا لسنتين قدام كدا يكون الواحد خلص ولا لا :d
ربنا معاك ومعانا

بص يا ادهم هى كليتنا لها مزايا اولها انت فى سنه اولى مبتتخصص وفى سنه تانيه بتاخذ تتدريب صيفى بعد ما تخلص الامتحانات وفى سنه 3 بتتدرب فى مصنع بعد الامتحانات وفى سنه 4 اثناء الدراسه بدرس فى مدارس للتدريب يعنى بتعلمك كل حاجه تبقى مهندس فى مصنع وتبقى مدرس ثانوى صنايع وتبقى مدرس عملى ونظرى بس المشكله الوحيده اللى الطلبه او الخرجين ان النقابه بتعتنا هى نقابه التطبقين
ونصحتى ادخا الكليه هى حلوه احسن مايبقى معاك تعليم متوسط يبقى معاك تعليم عالى وحتفيدك فى الشغل بعد كدا

مرحبا بيك يا ادهم فى منتدى تعليم ويارت الاستمرار معنا بالافاده او طر اسئلتك وشكرا ليك

Ahmed Magdy Muhammed
احمد باشا بتعادل درجة الهندسة من ناحية ايه ياباشا
عاوز اقولك حاجة بس انا فى سنة اولى شجعت نفسى كويس
وشجعت بعض الزملاء يكملو فى الكلية وماشاء الله كملنا وحققنا المطلوب ان اول سنة تعدى لانها بتكون صعبة دايما فى اى مرحلة دراسية
بص انا ممكن ردى السابق كان فيه تحطيم للمعنويات للعضو بس اقولك حاجة
انا قولت الحقيقة فيه انا فى سنة تانية ومش عارف حاتخرج ايه غير مدرس صنايع بس لماشفت المنتدى ومواضيعه
لقيت اللى بيقول تتخرج مهندس او مشرف وهكذا
كانت فيه محاضرة فى سنة اولى لنجيب الشيخ فى الترم التانى محضرتهائ بس زملائى قالوا ليا ان العميد قالهم حتتخرجوا
مدرسين واسم الكلية مش حيتغير والخ وقال اسمها تعليم صناعى يعنى تطلع مدرس صنايع
تخيل ان الكلية ملهاش فرع فى وجه بحرى كله
يعنى عذاب وقهر 4 سنين مش عشان الكلية وحشة عشان ملهاش فروع تانية وعشان هى مش هندسة
فيها ايه يهتموا بيها ويخلوا لها نقابة وتعادل درجة الهندسة بحق وحقيقى
مش كلام وخلاص
واحنا طلاب زى بعض وفاهمين الدنيا ماشية ازاى

يا اخ اسامة عبد الحميد والنبي انا مش ناقص احباط كفايه اللي انا فيه انتا بكلامك ده هتخليني اروح اسحب ملفي من الكلية بكره
يعني انا لو اتخرجت من الكليه دي يعني اخرتها هكون مدرس صنايع طب ليه بندرس في الكلية فيزياء وكيمياء ورياضه ورسم فني علي اساس انها كلية الهندسة يعني ولا ايه
بجد انا محتار كل شويه واحد يفتكس حوار اللي يقول هتتخرج مهندس واللي يقول هتتخرج مدرس صنايع واللي يقول كليتك ملهاش مستقبل واللي يقولي اسحب ملفك من الكلية واشتغل بالدبلوم وبلاش غربه ووجع دماغ
واللي يقولي حول تربيه نوعيه علي الاقل اسمها احسن من التعليم الصناعي يا رب صبرني علي مابلاني
انا جايب 88% وكليتكو دي كانت بتاخد من 75% بجد ده ظلم
وليه بتقبل طلبة الثانوي من 50 % وطلبة الصنايع 3 سنين من 80%
وانا اللي طلع عيني في الصنايع 5 سنين وجبت 88% اتساوي بطالب الثانوى العام اللي جايب 50 % بجد مبقاش في عدل

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي

بالصلاة على النبى يا جدعان انا هكلم كلام بجد مش هزار و الله العظيم انا كنت داخل الكلية دى و بذاكر مزاكرة جامد جدا ودخلت امتحان سنة اولى والحمد الله حليت بشوف النتيجة لقيت ظلم بطريقة فوق ماتتصور والحمد الله جات فى سنة تانيةكانت عندنا مادة اسمها كيمياء صناعية ودى على طالبة سنة تانية السنة دى انا دخلت الامتحان ده مليت ورقة الاجابة كلها لدرجة انا كتبت على اخر الورقة الاهى الغلاف من جوة و طالع الحمد الله تمام يوم النتيجة اروح اشوف النتيجة الاقى نفسى جايب فيها ضعيف و الله العظيم انا بكلم بجد بس الحمد الله اخر السنة اترفعت وجبت تقدير تمام الحمد الله بس انا بقولك فى الكلية دى انت ونصيبك يعنى انت و حظك من ساعة ماعرفت انا الكلية كدا انت هتشوف كل حاجة ذل و ظلم وامشى على مثل مطرح مترسى دقولها ضربوا الاعور على عينه قالوا خربانة خربانة

ايه يا جدعان انتوا فيه ايه متهدوا شويا كدا وقلنا صلو علي النبي
عقدتوني قبل ماتعقدوا الراجل
بص يا عم ادهم انا هريحك من الليله دي كلها عشان منقعدش نرغي ومنوصلش لحاجه
قولي انت هتتواجد امتي ف الكليه و انا هقابلك واجبلك الناس الحلوه اللي اعده تزهقك ف الكليه دي و نرسيك علي الموضوع لاني اتحرق دمي بصراحه من الكلام دا كله بما فيهم بلالللللللللللللللللللللل
اولا استاذ اسامه
بغض النظر عن الروتينيات و ان كانت بتعادل هندسه رسمي ولا لا
انا مقصدتش بكلامي كدا
انا قصدت بكلامي انها بتعادل هندسه علما وموادا , دلوقتي اللي يدخل الكليه دي وحاطط ف دماغه هدف انه يتعلم منها ويستفاد بكل اللي بياخده فيها علميا و عمليا هيبقي احسن واحد ف الدنيا واحسن من المهندس كمان
يابني بيبقوا واخدين هندسه و ميعرفوش الالف من كوز الدره
الفكره مش فكره هندسه ولا جبر ولا الحوارات دي كلها
الفكره انك مستواك الفكري والاجتماعي كبني ادم بيترفع و بيكون احسن لمجرد انك دخلت كليه ودرست واتعاملت مع ناس بمستويات مختلفه
غير دا كله زي مابقولك الزمن دا مش زمن شهادتك ايه و منين وفين
زمن اللي فاهم يسلك
لو انا صاحب مصنع دلوقتي وجالي اتنين واحد تعليم صناعي وواحد هندسه
و جيت عملت انتر فيو للاتنين ولقيت ان بتاع التعليم الصناعي عنده خبره عمليه اكتر بتاع الهندسه ومتفوق عنه هقول لا
مش هاخد بتاع تعليم صناعي واخد بتاع هندسه عشان اسمه بتاع هندسه ؟؟؟؟؟؟؟؟؟؟؟؟؟
هوا دا النظام اللي ماشي ف البلد دلوقت بغض النظر عن الكوسه طبعا
بس عشان تبقي عارف اي شغلانه ف البلد دلوقتي بقت تعتمد علي الخبرات اكتر من الشهاده ماعدا الشغلانات الاداريه طبعا
ومتنساش ( ان الله لا يضيع اجر من احسن عملا ) يعني مش هتتعب انت او ادهم ف الصنايع و الكليه وتجيب تقديرات و ربنا يضيع تعبك دا كدا ,,,,,
ياريت بقي اشوفك ف الكليه اما تيجي
نيجي للسيد بلال
بصراحه انا مش لاقي تعليق اعلق بيه علي كلامك , بس يا بلال انا زيي زيك اهو ف الكليه و درست اللي انت درسته بدكاترتها بكتبها و متظلمتش مره واحده من ساعت مادخلتها
هيا المره الوحيده اللي حسيت فيها بالظلم ف الكيميا , بس ظلم عن ظلم يفرق
دا ظلم جماعي و كلنا زي بعضنا فيه و خدنا حقنا فيها تالت ومتلت , لكن غير كدا والله حتي التقديرات اللي كنت بجيبها ضعيفه او مش عاجباني ببقي عارف ان هوا دا تعبي واني استاهلها ,,,, ومتنساش نفس الجمله اللي لسه قايلها ل اسامه
ان الله لا يضيع اجر من احسن عملا ,,,,,ربنا عادل يا بلبل
و انت يا حج محمد يا رمضان الوحيد اللي بل زوري بكلمه ربنا يزيدك يبني كمان و كمان

يا عم احمد انت اخذت حق فى الكمياء لما عمنا وقفه عند العميد ادام انت لو معملتش كدة مش هناخد حاجة وشوف اسلوب المعيدين معانا فاكر معيد الميكانيكا و الا كان بيعمله مابلاش نفتح الحق يتقال ولا الا يقول الحق يبقى مبيفهمش حاجة ولا ايه ياعم احمد و الكلام ده كان على يدك ولو الكلام غير كدة يبقى انا غلطان
و انا ياعم احمد مش قاصد انى ازهقه فى الكلية ما اى كلية فى مصر فيها مميزات و عيوب مش كليتنا فقط انا بكلم من حيث الواقع مش قاصد انى اقول لى ادهم ان هو ميجيش الكلية انا احب اقوله كل واحد لى نظرية فى الموضوع ده ويجى الكلية ويذاكر وياخده بجدية و انشاء الله هتبقى سنة سعيده عليه و علينا يارب

ايه يا بلبل انت سخنت كدا ليه يابني انت , يابني انا بقولك من اول الكلام ان ظلم عن ظلم يفرق
الظلم الجماعي مبيخنقش البني ادم وياثر فيه زي الظلم الفردي , لان الاجماعي بتلاقي اللي يواسيك فيه من اصحابك و كدا و مش بتحس انك لوحدك , و غير كدا منا بقولك يابني احنا اخدنا حقنا تالت و متلت
ومعيد الميكانيكا كان في اللي اخدلنا حقنا منه و مخلهوش يظلمنا وهو الدكتور محمود غباشي , و المعيد مكانش ليه اي تاثير علينا بالعكس دا احنا اتظبطنا ف التقديرات ف الفاينل
انا نفسي حالل ربع الامتحان غلط عشان مكنتش مراجع كويس و جبت 71 ف الميكانيكا
والمفروض اني اجيب كتيري اوي 60 يبقي اتظلمنا ولا الدكتور مخلاهوش يظلمنا ؟؟؟؟؟
وانا ياعم مش قصدي انتقد كلامك يعني حرية الرأي مكفوله لكل الطلبه ياعم :d وبعدين بعيد عن كل دا انت حبيبي يعني عيب عليك تزعل مني يعني ؟؟؟
يلا اشوفك علي خير الاسبوع اللي جي كدا

ياعم انا مقدرش ازعل من اخويه الكبير دانت حبيبى

بص يامعلم عسان متقولش بحبطك ولا لا شوف ردى التانى فى الموضوع
ثانيا انا اتكلمت على ان شايفه
ممكن اكون غلطان ومش عاوز ضميرى يانبنى عشان ردى عليك فى الموضوع
اللى انت شايفه اعمله شاور قلبك وعقلك وتوكل على الله
بس مش حتحمل انك تحملنى كلمة احباط
+
ان شاء الله اقرا كلامك يااحمد
وارد عليه فيما بعد

بمناسبة الكلام عن الكيمياء
الدوك اشرف جى سخن علينا الترم ده
بيقول باللفظ اسخم دفعة سنة تانية السنة اللى فاتت وجب معاهم
بس هم عملوا معاه الصح
)