خر كلام بخصوص معادله درجه البكالوريوس

اخر كلام بخصوص معادله درجه البكالوريوس

بسم الله الرحمن الرحيم
السلام عليكم ورحمه الله
النهارده انا كان عندي ميعاد مع مدام ايلينا في السفاره الروسيه
عرضت عليها المشكله بتاعتنا كلها
بصراحه هي استغربت ان في ناس بتدرس مواد هندسيه ومنتسجلش في النقابه
وقالت لي في روسيا لو درست مواد هندسيه بتسجل في النقابه ولكل مطلق الحريه تشتغل في التدريس او المصانع .... الخ
المهم
ياريت تركزوا معايا كويس وتفهموا الكلام ده
احب اوضح لكم نقطه قبل ما اقول لكم ملخص اللقاء
انت لو درست في اي جامعه اوروبيه او في روسيا بيكون ليها ميزة كويسه جدااا
هو ان شهادتك بتكون معتمده في اوروبا كلها يعني تقدر تسافر اي بلد في اوروبا تشتغل مهندس
مش عايز اقول لكم ان المهندس هناك والدكتور بيكون مرتبه كاااام
بس اللي اقدر اقوله بتكون حياته افضل بكتييير من هنا
وعايز اقول لكم ان روسيا فيها جامعاااااااااات كتير يعني تقدر تستوعب كل الخريجين
وخصوصا لما قلت لها ان العدد بتاعتنا ممكن يوصل ل 3000 شخص
قالت ده كتير قلت لها وزعيهم في روسيا مش راح يكون له اي اثر
قالت لو ناس محترمه ومحتاجه العلم او الشهاده علشان خاطر النقابه احنا موافقين نساعدكم جداااا علشان تكونوا في حياه افضل
نرجع لتفاصيل اللقاء
هي سمعت كل تفاصيل المشكله من اولها وفهمتها كويس
وقالت لي الحل الافضل قصادنا هو الاتي
اول شيء بتاخد تدريب في روسيا لمده سنه برسوم مخفضه ودي اسمها سنه تمهيدي
بتتعلم فيها الروسي هنا وبيعلموك روسي - عربي
يعني الكلمه بالروسي ومعناها بالعربي
في خلال الفترة دي بتقدم ورق الكليه وطلب معادله درجه البكالوريوس وده بدون فلوس خالص
بتقدم الطلب وبيشوفوا المواد اللي ناقصاك وطبعا انت دارس في مصر اربع سنين معترف بيهم هناك رسمي وخصوصا اننا خارجين من جامعات حكوميه مصريه
بعد كده بيحدد لك الكورسات اللي ناقصاك بتدرسها هناك في الجامعه في مده سنه ولو طلعوا كتييير ممكن تدرس علي سنتين زى ما تفضل وحسب لوائح كل جامعه هناك
تاني شيء
المصاريف شامله الاقامه والدراسه
بمعني انت لو راح تدفع 1000 يورو فا الالف دول شاملين الدراسه والاقامه و التامين الصحي

نرجع تاني للمصاريف
روسيا فيها جامعات كتييييير جدا كل جامعه لها لوائح ومصاريف تختلف عن اي جامعه تانيه
يعني كل واحد وامكانياته الماديه بمعني انت تقدر تدرس بدايه من 1000 يورو لحد 4000 يورو في السنه وده لتخصص الطيران للي عايز طبعا
جامعه موسكو 2500 يورو وده ممكن يرخص برضه وخصوصا ان افضل جامعه في روسيا كلها هي موسكو
دلوقتي انا بتكلم عن تخصص الكهربا
انا خريج قسم كهربا وعايز اعادل الشهاده علشان اقدر ادخل النقابه
طبعا من حق اي واحد يدرس اي تخصص هو عايز يدرسه يعني هناك في روسيا في جامعه الطاقه وعلومها ودي الافضل طبعا بتمكنك من دراسه الطاقه وانواعها وفيها تخصصات التخصصات
في جامعات تانيه خاصه بالهندسه بس وفيها اقسام الكهربا والميكانيكا والعماره وخلافه
يعني انت قسم ميكانيكا سيارات وعايز تدرس من حقك تقدم وتدرس التخصص اللي يريحك
يعني لو عايز تغير وتدرس طيران او تدرس حتي بترول من حقك
نرجع ونقول ايه المطلوب منك
مطلوب منك تجيب صورة من الباسبور بتاعك يكون صالح السفر للدول الاوروبيه
تاني شيء 4 صور شخصيه بتسلمهم في هنا و 6 بيكونوا معاك هناك في روسيا
تالت شيء مطلوب منك مبلغ 200 يورو وده للتعاقد مع الجامعه علي انك تدرس هناك وتاخد بكالورويس هندسه يسمح لك بالتسجيل في النقابه
رابع شيء بعد ما تيجي الموافقه من الجامعه هناك علي قبولك في الدراسه فيها
بتدفع رسوم السنه التمهيديه وهي بتكون رسوم رمزيه مش رقم كبير
بتدفعه من هنا وده افضل لك
بعدها بتاخد فيزا دراسه في روسيا و تسافر تدرس هناك
الدراسه بتبدا في شهر سبتمبر وتنتهي في شهر يونيه
وهي عباره عن ترمين الترم الاول بيبدا من يوم 1/9 وحتي 25 يناير وده بيكون اخر يوم لك في الامتحانات بتاعه التيرم
تاني تيرم بيكون من يوم 9 فبراير وحتي 30 يونيه وده اخر ميعاد للامتحانات
بترجع مصر او بتقيم في روسيا اللي تفضله زى ما تحب

بقول تاني الدراسه باللغه الروسيه ولما سالتها ما ينفعش بالانجليزي ردت وقالت ان المناهج في مصر بالانجليزي وبيشرحوا بالعربي
في روسيا لو المنهج انجليزي راح يشرحوا بالروسي وده راح يكون صعب انكم تفهموا وممكن تسقطوا وتدخل ساعتها علي التمهيد من تاني وبكده انت راح تخسر فلوس وراح تخسر وقت
نوضح شيء للناس
يا جماعه بعد ما تدرس هناك بتاخد شهادتين
اولي بكالوريوس هندسه ومن حقك تعمل ماجيستر ودكتوراه هناك في اي وقت وتكلفتها مش غاليه
وطبعا من حقك من دلوقتي تاخد الماجيستير هناك علي طول بس انا رفضت لان ما بني علي باطل فهو باطل يعني لو اخدت الدكتوراة من روسيا وانت مش مسجل في نقابه مهندسين كانك ما درست و لا يعترفوا بيك
فالافضل امشوا خطوة خطوة
تاني شهاده
بتاخد شهاده مترجم روسي معتمد
ودي بيكون لها مميزات كتيييير انك تحضر ندوات في المركز الثقافي وخلافه وفي النفس الوقت لو عايز تشتغل جزء اضافي في السياحه او مترجم للفنادق للافواج الروسيه من حقك ومعترف بيك ده لو بتحب انك تشتغل اضافي

اللي فيكم محتاج يقدم
يتفضل يروح المركز الثقافي الروسي وانا بفضل اللي في الاسكندريه لان المدام هناك فاهمه المشكله واستوعبتها وكل اللي قالته دي كارثه لما كليه حكوميه بتدرس مواد هندسيه ومش معترف بخريجيها ولا بيشتغلوا بالشهاده بتاعتهم
وقالت ان من حقك تختار اذا كنت تشتغل مدرس او مهندس بعد تسجيلك في النقابه
ووعدت بانها تساعد اي عدد يتقدم لها
فهي ممكن تساعدنا
مواعيد مدام ايلينا
يوم الاثنين من الساعه 11 الي الساعه 2 ظهرا
ويوم الثلاثاء من الساعه 2 ظهرا حتي الساعه 6 مساء
ويوم الاربعاء من الساعه 11 الي الساعه 2 ظهرا
يعني لو عايز تقدم ورقك دلوقتي اتفضل
بتقبل اي دفعه وبتقبل اي تقدير
وطبعا اي تخصص

انا كده اديت رسالتي
واي حد فيكم عايز يبدا دراسه هو وامكانياته يتفضل فورا
والله ولي التوفيق
اتمني لكل واحد يدعوا لي بالخير
وعلي فكرة الموضوع بجد وحقكم مش راح يضيع
علي فكرة انت ممكن تختار الجامعه علي حسب فلوسك

لا يضيع حق وراه مطالب

جزاك الله خيرا
بس بالنسبة للمتزوج ويعمل فى مصر له سبيل لهذه المعادلة

» معادلة درجة البكالوريوس لكلية التعليم الصناعى